Recep Tayyip Erdogan, presidenti i Turqisë, komentoi tensionet në Lindjen e Mesme gjatë një darkë iftar me anëtarët e Komitetit Qendror të partisë së tij dhe përfaqësues lokalë, më 2 mars 2026.
Ai u bëri thirrje SHBA-së, Izraelit dhe të gjitha palëve për armëpushim të menjëhershëm dhe rikthim në dialog. Erdogan paralajmëroi për “skenarë të fshehtë dhe llogari të rrezikshme” pas dyerve të mbyllura, që ndikojnë rajonin, duke thënë se Turqia i njeh mirë këto grackë dhe ambicie.
Presidenti turk theksoi aftësinë e Turqisë për të menaxhuar krizën falë përvojës së stafit dhe strukturave të sigurisë. Ai kërkoi unitet kombëtar dhe solidaritet, duke nënvizuar rëndësinë e politikës së jashtme të fortë, ekonomisë dhe industrisë mbrojtëse për të përballuar sfidat.
“Ne e njohim mirë çdo grackë, çdo llogari të fshehtë dhe ambiciet që qëndrojnë pas tyre. Turqia do t’i përballojë këto sfida me kokën lart, duke ruajtur stabilitetin dhe sigurinë e qytetarëve tanë”, deklaroi Erdogan. Ai paralajmëroi se vazhdimi i konflikteve mund të ketë pasoja serioze për sigurinë rajonale dhe botërore.
Ankara ka intensifikuar kontaktet diplomatike me udhëheqës ndërkombëtarë, përfshirë presidentin Trump, udhëheqësit e Emirateve, Katarit, Kuvajtit, Arabisë Saudite, Gjermanisë dhe NATO-s, për të parandaluar përshkallëzimin.
Erdogan shprehu ngushëllime për viktimat iraniane, dënoi sulmet që shkelin ligjin ndërkombëtar dhe theksoi solidaritetin me popullin iranian. Ai nënvizoi domosdoshmërinë e armëpushimit për të shmangur përhapjen e dhunës në rajon.