Gjatë pjesëmarrjes në festivalin teknologjik TEKNOFEST Juglindje, i cili u zhvillua në provincën turke Sanliurfa, presidenti Recep Tayyip Erdogan vlerësoi përparimin e vazhdueshëm të vendit në industrinë e mbrojtjes. Ai e përshkroi këtë proces si një "revolucion të plotë", duke u zotuar se do të vazhdojnë punën për të shtuar arritjet përmes zhvillimit të platformave të reja teknologjike.
Sipas presidentit Erdogan, shteti turk mbetet i angazhuar në forcimin e pozitave të tij në tregun global të mbrojtjes. Ai theksoi synimin për të ndërtuar platforma me konkurrueshmëri të lartë dhe vlerë të shtuar, duke u shprehur se arritjet do të shënohen përmes rekordeve të reja. Një ndër shtyllat e kësaj strategjie, sipas kreut të shtetit turk, është edhe gatishmëria për të ndihmuar vendet mike në përmbushjen e nevojave të tyre për mbrojtje, kur kjo kërkohet.
"Kur na kërkohet, ne gjithashtu përmbushim nevojat e miqve tanë për mbrojtje. Ne besojmë se sa më të fortë të jenë miqtë tanë, aq më të fortë do të jemi edhe ne", u shpreh ai gjatë fjalimit të tij. Erdogan përfundoi deklaratën e tij duke u shprehur se me lejen e Zotit, vendi do të arrijë suksese edhe më të larta në këtë sektor të rëndësishëm strategjik.