Kandidati për ambasador të Shteteve të Bashkuara në Shqipëri, Eric Wendt, u pyet gjatë seancës dëgjimore në Senatin amerikan për rolin e SPAK-ut. Ai e përshkroi strukturën si organizim apolitik, i pavarur dhe i suksesshëm, bazuar në informacionet që ka lexuar dhe në vizitat e mëparshme në vend.
Wendt theksoi se prokurorët e SPAK-ut i nënshtrohen procesit të fortë të verifikimit, përfshirë vettingun dhe testet me poligraf. Ai përmendi gjithashtu rolin e Byrosë Kombëtare të Hetimit, prokurorëve specialë dhe gjykatave të posaçme.
Në përgjigje të pyetjes së senatores Shaheen, Wendt u shpreh se pavarësia e SPAK-ut ndikon drejtpërdrejt në përmirësimin e klimës së investimeve dhe në rritjen e transparencës. Ai shtoi se bashkëpunimi me autoritetet amerikane ka çuar në hetime dhe procedime penale ndaj personave të përfshirë në aktivitete kriminale ndërkombëtare.
Nëse konfirmohet në detyrë, Wendt tha se do të mbështesë vazhdimin e punës së SPAK-ut, duke theksuar rëndësinë që institucioni të mbetet jashtë ndikimit politik.