Deputeti i Partisë Socialiste, Erion Braçe, ka reaguar me dënim të ashpër ndaj dhunës së ushtruar në protestën e thirrur nga kryedemokrati Sali Berisha në oborrin e Kuvendit të Republikës në Tiranë, më 10 shkurt 2026.
Përmes një postimi në rrjetet sociale, Braçe e ka konsideruar ngjarjen jo si protestë të garantuar nga ligji, por si përpjekje të militantëve për të vrarë shërbyesit e policisë në detyrë. Ai ka theksuar se ky model protestash nuk është më i mbrojtur ligjërisht dhe ka kërkuar që policia dhe drejtësia të mos e falin këtë akt, ashtu siç ka ndodhur në të kaluarën gjatë 12 vitesh.
Postimi i plotë i Erion Braçes:
"Tirana sot, oborri i Kuvendit të Republikës;
Kjo nuk është më protestë – e garantuar dhe e mbrojtur nga ligji;
Këta nuk janë më protestues – në të drejtën e tyre dhe të mbrojtur nga ligji;
Kjo është përpjekje për të vrarë shërbyes të shtetit – policë të Shtetit në detyrë!
Shihini pamjet! Me prova se kaq nuk ka!
Nëse policia dhe drejtësia e falin këtë përpjekje për të vrarë – siç është toleruar çdo herë në 12 vite,
atëherë kjo është tradhti shumë e madhe ndaj atyre burrave e grave të ndershëm që po mbrojnë shtetin, shtetin e shqiptarëve, as të partive e as të politikanëve!!"
Braçe ka përmendur pamjet si provë dhe ka paralajmëruar se falja e këtij akti do të ishte tradhti ndaj forcave të rendit.