Taulant Balla, kreu i grupit parlamentar të Partisë Socialiste, dënoi sulmet ndaj punonjësve të policisë dhe institucioneve gjatë protestës së opozitës, të drejtuar nga Sali Berisha, të zhvilluar më 10 shkurt 2026 para Kryeministrisë.
Protesta u shoqërua me hedhje molotovësh, fishekzjarrësh dhe gurësh ndaj forcave të rendit. Një punonjës policie mbeti i lënduar nga këto incidente.
Në një postim në Facebook, të shoqëruar me video nga droni që tregon pjesëmarrje të tkurrur, Balla shkroi: «Dy fjalë për fundin e protestave të bufit, ku sulmohen punonjësit e policisë dhe institucionet. Ndoshta për të fshehur me tym e flakë dështimin e tyre».
Ai nënvizoi se liria për të protestuar është e garantuar në Shqipëri, por dhuna ndaj forcave të rendit nuk justifikohet: «Gjithmonë do të ekzistojë liria për të protestuar në Shqipërinë tonë. Por sa kohë ligji e thotë qartësisht, nuk duhet të ekzistojë liria për të goditur apo keqtrajtuar ata që kanë zgjedhur për të shërbyer në mbrojtje të sigurisë së qytetarëve».
Balla u bëri thirrje shoqërisë të reflektojë mbi rëndësinë e uniformës së policisë dhe drejtësisë të bëjë shembull sulmuesit: «Duhet t’i mbrojmë ata që na mbrojnë dhe duhet të kujdesemi për ata që shërbejnë për sigurinë e qytetarëve. Kjo është ajo që bën një shtet i drejtë dhe normal».
Ai theksoi rolin e policisë: «Policia i ka shërbyer dhe i shërben me devotshmëri atdheut dhe qytetarëve, përplaset çdo ditë me kriminelë e keqbërës. [...] Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit».