Protesta e zhvilluar këtë të enjte para godinës së Kuvendit të Shqipërisë ka shënuar përshkallëzim të situatës, duke sjellë përplasje të drejtpërdrejta mes protestuesve dhe forcave të policisë.
Kryetari i grupit parlamentar të Partisë Socialiste, Taulant Balla, reagoi përmes rrjeteve sociale duke publikuar pamjet e një efektivi policie të lënduar në kokë. Në mesazhin e tij, Balla e cilësoi situatën si terrorizëm, duke theksuar se dhuna ndaj forcave të rendit është një goditje ndaj shtetit.
“Kjo nuk është më protestë paqësore, është terrorizëm. Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit”, shkroi Balla.
Sipas informacioneve nga terreni, tensionet nisën në orët e mëngjesit kur protestuesit dëmtuan gardhin metalik të sigurisë dhe hodhën sende të ndryshme, si vezë dhe domate, në drejtim të punonjësve të policisë. Në përgjigje të këtyre veprimeve, policia ndërhyri për të shpërndarë turmën duke përdorur ujë me presion dhe spraj me piper.