Deputeti socialist Erion Braçe ka ngritur shqetësimin në lidhje me çmimet e produkteve ushqimore dhe mënyrën se si disa subjekte tregtare aplikojnë kursin e këmbimit valutor. Në një reagim në rrjetet sociale, të shoqëruar me një video, ai deklaroi se pas pazarit të javës ka konstatuar që çmimet e fruta-perimeve dhe produkteve të përpunuara mbeten të larta, pavarësisht forcimit të lekut ndaj monedhave të huaja.
Sipas Braçes, supermarketet, dyqanet dhe stacionet e karburanteve nuk janë të autorizuara për të kryer këmbim valutor dhe kanë detyrimin ligjor të realizojnë transaksionet tregtare vetëm në lekë. Deputeti vuri në dukje se kurset e aplikuara nga këto subjekte, respektivisht 90 lekë për 1 euro dhe 77 lekë për 1 dollar, janë dukshëm më të ulëta se kursi zyrtar i Bankës së Shqipërisë prej 91,56 lekë për 1 euro dhe 80,22 lekë për 1 dollar.
Kjo situatë, sipas tij, tregon se tregtarët po përfitojnë nga blerja e lirë e valutës për të importuar produkte, por çmimet në raftet e dyqaneve nuk pasqyrojnë rënien e euros dhe të dollarit. Braçe theksoi se këto çmime të qëndrueshme të larta reflektojnë gjithashtu koston e lartë të prodhimit vendas, mungesën e mbështetjes dhe një industri ushqimore që ai e cilësoi si pothuajse inekzistente. Në fund të denoncimit, ai ngriti pikëpyetje për mundësinë e taksimit më të lartë të operatorëve që realizojnë mbifitime përmes këtyre parregullsive.