Kryetari i Bashkisë së Tiranës, Erion Veliaj, ka firmosur urdhrat për zbatimin e vendimit të formës së prerë të Gjykatës Administrative të Apelit, duke mundësuar rikthimin e Alban Dokushit në detyrën e Sekretarit të Përgjithshëm të Bashkisë së Tiranës.
Urdhrat përkatës janë protokolluar pranë institucionit dhe pason vendimin gjyqësor, i cili shpalli absolutisht të pavlefshme aktet për lirimin e Alban Dokushit nga shërbimi civil, si dhe urdhrat për ndërprerjen e marrëdhënieve financiare me të. Kujtojmë se Dokushi ishte shkarkuar më parë me urdhër të Anuela Ristanit.
Në arsyetimin e saj, Gjykata Administrative e Apelit ka vlerësuar se aktet e tilla konsiderohen juridikisht sikur nuk kanë ekzistuar asnjëherë, pasi nuk kanë hyrë në fuqi dhe nuk kanë prodhuar pasoja juridike. Gjykata thekson se vendimet me pavlefshmëri absolute nuk mund të korrigjohen apo të legjitimohen pasivisht nga organi që i ka nxjerrë fillimisht.