Gjykata Administrative e Tiranës ka hedhur shortin për padinë e kryebashkiakut Erion Veliaj kundër institucionit të Presidencës për periudhën 2007-2012 dhe prokurorit të posaçëm Olsi Dado. Shorti përzgjedhi gjyqtarin administrativ të shkallës së parë Hazbi Balliu për shqyrtimin e çështjes.
Veliaj depozitoi padinë më 23 janar 2026, duke kërkuar konstatimin e pavlefshmërisë absolute të dekretit të emërimit të Olsi Dado si prokuror në vitin 2008. Sipas pretendimeve, Dado kaloi direkt nga statusi i noterit në atë të prokurorit, pa përmbushur kriterin ligjor të ndjekjes së Shkollës së Magjistraturës.
Në padi thuhet se emërimi është bërë në kundërshtim me ligjin në fuqi atëherë dhe ka sjellë pasoja të rënda institucionale e administrative, jo vetëm për Bashkinë e Tiranës, por edhe për Republikën e Shqipërisë. Veprimet e Dados si prokuror kanë ndikuar drejtpërdrejt në procese lidhur me administrimin vendor dhe interesin publik.
Veliaj kërkon gjithashtu që Këshilli i Lartë i Prokurorisë të marrë vendim për përfundimin e statusit të magjistratit të Dados dhe pezullimin e detyrës. Më herët, ai ka kërkuar nga Inspektorati i Lartë i Drejtësisë dhe Këshilli i Lartë i Prokurorisë nisjen e hetimit dhe pezullimin e tij.
Kryebashkiaku Erion Veliaj ndodhet në burg që nga 10 shkurti 2025, ndërsa Gjykata Kushtetuese e riktheu në detyrë.