Në Gjykatën Administrative të Shkallës së Parë Tiranë zhvillohet sot seanca e radhës lidhur me padinë e paraqitur më 23 janar 2026 nga kryebashkiaku i Tiranës, Erion Veliaj. Padia kërkon konstatimin e pavlefshmërisë absolute të dekretit të vitit 2008, me anë të të cilit Ols Dado u emërua prokuror nga ish-Presidenti Bamir Topi.
Sipas kërkesë-padisë, emërimi i prokurorit Dado është kryer në shkelje të kërkesave ligjore, pasi ai nuk kishte përfunduar Shkollën e Magjistraturës në momentin e marrjes së detyrës. Veliaj kërkon gjithashtu që Këshilli i Lartë i Prokurorisë të detyrohet të marrë vendim për përfundimin e statusit të magjistratit për prokurorin në fjalë. Padia argumenton se veprimet procedurale të ndërmarra nga prokurori Dado ndaj kryebashkiakut janë të bazuara në një akt emërimi që pala paditëse e konsideron "nul ab initio".
Seanca e sotme pason shtyrjen e mëparshme, e cila u vendos për t'i dhënë mundësi palëve të njihen me kërkesën e shoqatës Asociacioni Kombëtar i Medias dhe Drejtësisë. Kjo shoqatë ka shprehur synimin për t'u bërë pjesë e procesit, me argumentin se çështja mbart interes të lartë publik dhe lidhet me integritetin e sistemit të drejtësisë në Shqipëri.
Përditësime
Gjykata Administrative shtyu seancën për padinë e Erion Veliajt ndaj prokurorit të SPAK, Ols Dado, për shkak të mungesës së avokatit Plarent Ndreca, i cili njoftoi një emergjencë shëndetësore familjare. Veliaj, i cili ishte i pranishëm në sallë, e shoqëroi shtyrjen me një koment ironik për procesin. Seanca e radhës është caktuar për më 24 korrik, në orën 09:00.