Ministri i Punëve të Brendshme, Ervin Demo, zhvilloi një takim me drejtues dhe punonjës të Shërbimit Zjarrfikës të Tiranës, duke i falënderuar për angazhimin dhe sakrificën në përballimin e situatave emergjente gjatë gjithë vitit. Ministri vlerësoi punën e tyre në garantimin e sigurisë, duke theksuar se shërbimi përballet me sfida të shumta, nga zjarret te aksidentet rrugore dhe emergjenca të tjera të rrezikut.
Sipas Demës, shërbimi zjarrfikës në kryeqytet po forcohet vazhdimisht përmes rritjes së kapaciteteve njerëzore, aftësive profesionale dhe logjistikës mbështetëse. Një pjesë e rëndësishme e diskutimit u fokusua te kalimi nga një qasje e përqendruar vetëm te reagimi, drejt një politike më të fortë parandaluese. Ministria e Punëve të Brendshme do të bashkëpunojë me bashkitë dhe strukturat e Emergjencave Civile për të hartuar një plan të përbashkët për sezonin e ardhshëm, me synim minimizimin e rasteve kur është e nevojshme ndërhyrja e forcave zjarrfikëse.
Duke u ndalur te specifikat e territorit, Ervin Demo theksoi nevojën për forcimin e strukturave vullnetare, sidomos në rrethinat e Tiranës, duke sjellë si shembull pozitiv modelin austriak. Ministri vlerësoi gjithashtu solidaritetin e zjarrfikësve të Tiranës, të cilët kanë asistuar në ndërhyrje edhe në bashki të tjera të vendit për mbrojtjen e pasurisë publike dhe private.