ESPN ka publikuar analizën për ndeshjen finale të play-off-it për Kupën e Botës 2026 mes Kosovës dhe Turqisë, duke parashikuar fitoren e Dardanëve.
Sipas këtij mediumi amerikan, skuadra kosovare ka potencialin për të befasuar kundërshtarin, pavarësisht se Turqia konsiderohet favorite në letër. Turqit kanë fituar dy ndeshjet e mëparshme midis dy ekipeve dhe posedojnë talente të nivelit të lartë si Arda Güler, Hakan Çalhanoğlu dhe Kenan Yıldız.
Analiza thekson cilësitë e ekipit të trajnerit Franco Foda, të cilin e përshkruan si të ri, guximshëm, të shpejtë dhe plot energji. Këto karakteristika mund ta ndihmojnë Kosovën të vërë në vështirësi Turqinë.
Ndeshja zhvillohet të martën në stadiumin Fadil Vokrri në Prishtinë. ESPN vlerëson se atmosfera pasionante në tribunat do të luajë rol vendimtar në favor të Kosovës.
Një fitore do ta kualifikonte Kosovën në Kupën e Botës 2026, duke shënuar një arritje historike për futbollin kosovar.