Mediat botërore mbulojnë finalen e Kosovës ndaj Turqisë për Botëror

Kosova luan të martën mbrëma ndaj Turqisë në finalen e plejofit evropian për kualifikim në Kupën e Botës në futboll. Ndeshja zhvillohet në stadiumin Fadil Vokrri në Prishtinë. Kosova është njëra prej tetë kombëtareve që kanë arritur në këtë fazë.

Mediat ndërkombëtare i kanë dhënë jehonë ngjarjes, duke theksuar mundësinë historike të Kosovës.

Raportimet kryesore

• Reuters shkruan: “Kosova e vogël kërkon historinë e Kupës së Botës me ndeshjen vendimtare kundër Turqisë”. Agjencia përshkruan rritjen graduale të ekipit dhe arritjen në finale, shkrim i përcjellë nga mediume të shumta.
• The Guardian vlerëson: “Çdo gjë është e mundur për Kosovën”.
• Në mediumin spanjoll AS, autori Alex Torres titullon: “Ndeshja që Fadil Vokrri duhej ta shihte”. Ai thekson rolin e ish-presidentit të Federatës së Futbollit të Kosovës, legjendës Vokrri, dhe shkruan: “Nesër Kosova përballet me Turqinë, me dijeninë që fitorja i siguron një vend në Kupën e Botës. Do të luajë në stadiumin që mban emrin e Fadil Vokrrit. Është trishtueshme që ai nuk do të jetë aty për ta parë, por kujtimi i tij do të mbetet i gjallë tek spektatorët. Asgjë nuk do të ishte e mundur pa të”.
• Revista gjermane Kicker raporton për bonusin e premtuar nga Qeveria e Kosovës: 1 milion euro për fitore në finale, me mundësi për shpërblime të tjera.
• Corriere dello Sport e quan Kosovën “një tjetër përrallë ballkanike”, duke përmendur rrënjët, largimet, rikthimet dhe fëmijët e shpërndarë në Evropë, si dhe yjet që luajnë ose kanë luajtur në Itali.

Mediumet kryesore turke kanë dërguar ekipe gazetarësh në Kosovë për të ndjekur përfaqësueset e të dyja vendeve. Ndeshja pritet me interes të madh në Turqi dhe vende të tjera.