Eurodeputete të grupit parlamentar Të Gjelbrit në Parlamentin Europian kanë mbërritur në Tiranë për të marrë pjesë në protestën kundër qeverisë. Ilaria Salis dhe Cristina Guarda kanë konfirmuar praninë e tyre për t'iu bashkuar protestuesve, ndërsa pjesëmarrjen e saj e ka bërë të ditur më herët edhe eurodeputetja gjermane Jutta Paulus.
Sipas organizatorëve, protesta e së shtunës është cilësuar si një manifestim mbarëkombëtar, ku u është bërë thirrje qytetarëve nga e gjithë Shqipëria dhe diaspora që të bashkohen në demonstratën kundër kryeministrit Edi Rama.
Jutta Paulus deklaroi se vizita e saj në Tiranë synon mbrojtjen e vlerave demokratike, sundimin e ligjit dhe çështjet mjedisore. Ajo u shpreh se dëshiron t'i dëgjojë nga afër shqetësimet e qytetarëve për t'i diskutuar ato në institucionet e Bashkimit Europian, me qëllim rritjen e vëmendjes ndaj vendimmarrjes së qeverisë shqiptare. Nga ana tjetër, Ilaria Salis ka konfirmuar se gjatë fundjavës do të zhvillojë takime me aktivistët që po i japin jetë kësaj lëvizjeje qytetare.
Përditësime
Eurodeputetja Cristina Guarda ka mbërritur në Tiranë, ku do të zhvillojë takime me aktivistë të opozitës gjatë fundjavës.