Eurodeputetja italiane Ilaria Salis iu bashkua pasditen e sotme protestës së 28-të kombëtare që po zhvillohet përpara godinës së Kryeministrisë në Tiranë. Prania e saj në tubimin masiv, i cili kërkon dorëheqjen e kryeministrit Edi Rama, u prit me duartrokitje nga mijëra protestues të mbledhur në bulevardin Dëshmorët e Kombit.
Gjatë fjalës së saj, Salis theksoi rëndësinë e mbrojtjes së pasurive natyrore të Shqipërisë, duke u shprehur kundër modeleve ekonomike që, sipas saj, bazohen në korrupsion dhe privilegjet e oligarkëve. Ajo deklaroi se zona si Ishulli i Sazanit dhe Laguna e Nartës duhet të mbeten të mbrojtura dhe nuk duhet të shndërrohen në "park lojërash për pasanikët".
"Europa nuk është Bruksel, por Europa është këtu në Shqipëri. Këtu po bëhet historia, këtu po hapet rruga për të gjithë popujt", u shpreh ndër të tjera eurodeputetja, duke shtuar se qytetarët duhet të marrin në dorë fatet e tyre. Sipas saj, sfidat me të cilat përballet Shqipëria, në lidhje me interesat e ngushta, janë të ngjashme edhe në pjesë të tjera të Evropës.
Ky angazhim i Ilaria Salis ishte paralajmëruar më herët, kur ajo bëri të ditur udhëtimin drejt Shqipërisë për t'u takuar me aktivistët dhe qytetarët që protestojnë prej katër javësh. Pjesëmarrësit e konsideruan praninë e saj si një sinjal mbështetjeje nga aktorë të skenës politike ndërkombëtare për kauzat e tyre.