Thomas Waitz, eurodeputet austriak, deklaroi se Kosova ka bërë përparim të dukshëm në ndërtimin e institucioneve demokratike dhe në proceset zgjedhore. Ai e vlerësoi vendin si ndër kandidatët kryesorë për anëtarësim në Bashkimin Evropian, nëse trajtohej si aplikante e zakonshme.
Sipas Waitz-it, Kushtetuta e Kosovës është në përputhje të lartë me standardet evropiane. “Kosova është një vend që ka një kushtetutë shumë të afërt me kushtetutat evropiane. Është një vend që ka dhënë shembull se si organizohen zgjedhjet në rajon, dhe edhe aty ku ka pasur dyshime, janë bërë rinumërime të rregullta. Disa vende të rajonit mund të mësojnë nga ky shembull”, tha ai.
Sa i përket luftës kundër korrupsionit, eurodeputeti theksoi se Kosova është në rrugë të mirë, por procesi mbetet sfidues. “Kosova është në një rrugë të mirë sa i përket luftës kundër korrupsionit. Megjithatë, kjo është një betejë e vazhdueshme, siç ndodh edhe në të gjitha shtetet tona anëtare”, u shpreh Waitz.
Ai deklaroi se, nëse Kosova do të ishte aplikante e rregullt, do të renditej ndër vendet kryesuese. “Ende ka reforma për t’u bërë dhe përmirësime për t’u parë, por vendi do të ishte në një pozitë të mirë”, shtoi ai.
Megjithatë, Waitz nënvizoi pengesat politike dhe mungesën e njohjes nga Serbia. “Arsyeja pse nuk është kështu lidhet me faktin se Kosova ende nuk njihet nga Serbia dhe vazhdon të bllokohet në rrugën e saj. Kjo është një çështje ku pajtohem me kolegët, sepse elita politike nuk është e gatshme për kompromis”, tha ai.
Në fund, ai kërkoi respektimin e rezultateve të zgjedhjeve në Kosovë. “Ka pasur dy palë zgjedhje që kanë treguar një fitues të qartë dhe kjo duhet të pranohet”, përfundoi Thomas Waitz.