Eurodeputeti austriak Thomas Waitz, nga grupi i të Gjelbërve në Parlamentin Evropian, i ka drejtuar Komisionit Evropian pyetje me shkrim lidhur me planet për ndërtimin e infrastrukturës së re të gazit fosil në vendet kandidate për anëtarësim në Bashkimin Evropian, përfshirë Kosovën.
Në pyetjet e tij, Waitz thekson se Kosova ka miratuar tashmë Strategjinë e Energjisë, është në fazën përmbyllëse të Planit Kombëtar për Energjinë dhe Klimën (NECP) dhe po zbaton detyrimet nga Ligji për Klimën. Megjithatë, eurodeputeti vëren se diskutimet politike për zhvillimin e rrjetit të gazit janë intensifikuar, ndonëse vendi aktualisht nuk zotëron treg të gazit, rrjet shpërndarës, kapacitete magazinimi apo kërkesë të dokumentuar për këtë burim energjie.
Waitz shtron tri çështje kryesore për Komisionin Evropian:
• Vlerësimin e përputhshmërisë së propozimeve për infrastrukturë gazi me objektivat e Agjendës së Gjelbër, detyrimet ndaj Komunitetit të Energjisë dhe procesin e NECP-së.
• Nevojën që investimet nga vende të treta apo partnerë ndërkombëtarë të jenë të harmonizuara me strategjitë kombëtare të energjisë dhe situatën reale në terren.
• Mënyrën se si Komisioni Evropian synon të nxisë debat publik të bazuar në fakte, në një kohë kur diskutimet për gazin fosil ndikojnë debatin politik, pavarësisht objektivave për dekarbonizim, rritje të efikasitetit dhe zgjerim të burimeve të ripërtëritshme.