Kontinenti evropian po përballet me një situatë kritike për shkak të zjarreve pyjore, me paralajmërime se muaji gusht mund të sjellë një përshkallëzim të mëtejshëm të kësaj krize. Maria Zoubert, drejtoreshë e Qendrës së Koordinimit të Reagimit ndaj Emergjencave të BE-së (ERCC), ka bërë të ditur se viti 2026 mund të shënojë rekordin më të rëndë historik për nga dëmet e zjarreve, duke tejkaluar nivelet e vitit të kaluar.
Sipas ekspertëve, shkak për këtë rrezik të shtuar është sasia e madhe e bimësisë së krijuar gjatë reshjeve të bollshme të dimrit dhe pranverës. Kjo bimësi është tharë për shkak të temperaturave të larta gjatë stinës së verës, duke shërbyer si material lehtësisht i ndezshëm. Situata vlerësohet si “shumë e vështirë”, veçanërisht në Francë dhe Spanjë, ku autoritetet po përpiqen të vënë nën kontroll vatrat aktive.
Përhapja e zjarreve dhe rreziqet në rajon
Në Greqi, vëmendja ndërkombëtare është përqendruar te tragjedia në Rethymno, ku humbën jetën dy zjarrfikës gjatë operacioneve të shuarjes së flakëve. Ndërkohë, alarme për vatra të reja zjarri janë ngritur edhe për vende të tjera, përfshirë Italinë dhe Europën Qendrore.
Edhe jashtë territorit të Bashkimit Europian, në jugperëndim të Turqisë, situata është përkeqësuar. Një zjarr i madh në provincën Mugla ka detyruar autoritetet të mbyllin përkohësisht autostradën që lidh Fethiyen me Antalian. Flakët, të favorizuara nga erërat e forta, kanë depërtuar në zona pyjore dhe rurale, duke shtuar nevojën për ndërhyrje urgjente.
Paralajmërimet zyrtare theksojnë se nëse vatrat aktuale në Portugali dhe Spanjë nuk vihen shpejt nën kontroll, ekziston rreziku i një përshkallëzimi të gjerë në të gjithë kontinentin gjatë ditëve të para të gushtit.
Përditësime
Autoritetet turke kanë evakuuar turistët dhe banorët në Adrasan dhe Olympos për shkak të dëmeve të rënda nga zjarret. Aktualisht, rreth 3.000 forca emergjente po përballen me 90 vatra të reja në provincat Balıkesir, Kütahya, Çanakkale dhe Yalova. Ndërkohë, në Greqi, ekspertët konfirmuan se humbja e jetës së zjarrfikësve në Rethymno ndodhi për shkak të humbjes së orientimit nga tymi i dendur, ndërsa në Kretë, fronti i zjarrit ka arritur në 15 kilometra, duke vështirësuar operacionet e shuarjes.