Fakulteti i Mjekësisë në Tiranë ka bërë publike listat paraprake të renditjes së kandidatëve për ndjekjen e studimeve universitare për vitin akademik 2026-2027. Sipas njoftimit zyrtar, kandidatët që renditen mbi vijën e kuqe në listat e publikuara për secilin program studimi, shpallen fitues të fazës së parë të raundit të parë.
Në total, janë shpallur 576 fitues në tre programe të ndryshme studimi:
• Mjekësi e Përgjithshme: 436 fitues
• Farmaci: 110 fitues
• Shëndet Publik: 30 fitues
Kandidatët të cilët kanë pretendime në lidhje me renditjen e tyre, kanë të drejtë të paraqesin ankimim më datë 24 gusht 2026. Kërkesa duhet të jetë me shkrim dhe të shoqërohet me kopje të Certifikatës së Maturës Shtetërore dhe të dokumentit të identifikimit (ID). Dokumentacioni dorëzohet pranë Zyrës së Protokollit të Rektoratit të Universitetit të Mjekësisë, Tiranë (UMT), ndërsa përgjigjja për çdo ankimim do të kthehet brenda 24 orëve.
Procesi i regjistrimit të kandidatëve fitues do të fillojë më datë 26 gusht 2026 dhe do të realizohet pranë sekretarive mësimore të fakulteteve përkatëse. Kjo listë vjen pas testimit të informatizuar që maturantët zhvilluan në datat 17-21 gusht në Qendrën e Shërbimeve Arsimore.