Familja e Virginia Roberts Giuffre, një prej viktimave të Jeffrey Epstein, reagoi me një deklaratë pas arrestimit të ish-princit Andrew Mountbatten-Windsor. Vëllezërit dhe motrat e saj, Amanda Roberts, Danny Wilson dhe Lanette Wilson, thanë se lajmi u dha ngushëllim.
"Më në fund, sot, zemrat tona të thyera u ngushëlluan nga lajmi se askush nuk është mbi ligjin, madje as familja mbretërore", u shprehën ata për New York Post. Në emër të motrës së tyre, familja falënderoi Policinë e Luginës së Thames në Mbretërinë e Bashkuar për hetimin dhe arrestimin e Andrew Mountbatten-Windsor.
"Ai nuk ishte kurrë princ. Për të gjithë të mbijetuarit: Virginia e bëri këtë për ju", shtuan ata.
Virginia Roberts Giuffre kishte pretenduar se Andrew kishte kryer marrëdhënie seksuale me të në tre raste të ndryshme kur ajo ishte adoleshente. Ajo u vetëvrave në prill të vitit 2025, në moshën 41-vjeçare. Në kujtimet e saj, të botuara pas vdekjes, Giuffre akuzoi hapur vëllain e Mbretit Charles për abuzim seksual dhe përshkroi takimet me të.
Pas këtyre zbulimeve, Andrew humbi titullin e princit dhe të gjitha privilegjet mbretërore. Zhvillimi rikthen në vëmendje çështjen e lidhur me financierin e ndjerë Jeffrey Epstein dhe marrëdhëniet e tij me figura të njohura ndërkombëtare.