Kryetari i Nismës Socialdemokrate, Fatmir Limaj, ka komentuar bashkimin e partisë së tij me Partinë Demokratike të Kosovës (PDK). Në një prononcim për emisionin "Rubikon" në Klan Kosova, Limaj e cilësoi këtë bashkim si një proces të natyrshëm dhe burimor.
Sipas Limajt, ky vendim pasqyron kërkesat e vazhdueshme të bazës dhe elektoratit, të cilat janë manifestuar në takimet dhe tubimet e zhvilluara anë e kënd Kosovës. "Diçka që buron nga baza, nga elektorati dhe nga kërkesat, është krejt e natyrshme, është burimore, me shumë dashamirësi dhe vullnet", u shpreh ai.
Kreu i Nismës shtoi se nga kontaktet e zhvilluara, është vënë re se është ndezur një elektorat i përbashkët. Ai theksoi se ky bashkim është pritur si lajm i mirëpritur nga mijëra votues të devotshëm të të dyja subjekteve politike.