Faza finale e Superiores, e njohur si Final 4, nis të shtunën me ndeshjen Vllaznia-Dinamo. Takimi është programuar të zhvillohet në orën 19:00 në stadiumin Air Albania.
Vllaznia vjen nga vendi i parë me 31 pikë dhe synon të ruajë avantazhin në garën për titull. Dinamo ndodhet në vendin e katërt me 24 pikë. Trajneri i Dinamos, Ilir Daja, është pezulluar dhe nuk do të jetë në stol.
AF Elbasani ka gjithashtu 31 pikë, ndërsa Egnatia mban 28 pikë. Të dielën në orën 19:00 luhet ndeshja e dytë e javës së parë, AF Elbasani-Egnatia.
Në gjashtë përballjet e këtij sezoni midis Vllaznisë dhe Dinamos bilanci është i barabartë: dy fitore për secilën skuadër dhe dy barazime.
Pikët e grumbulluara nga gjashtë ndeshjet e fazës Final 4 do t’u shtohen atyre të përgjysmuara nga kampionati i rregullt për të përcaktuar kampionin. Të gjitha ndeshjet e kësaj faze zhvillohen në stadiumin Air Albania.