Këtë të hënë, në ora 19:00, në stadiumin Air Albania, luhet derbi i kryeqytetit mes Partizanit dhe Dinamos për vendin e katërt në renditje, që siguron pjesëmarrjen në Final Four të kampionatit Superior.
Të dy skuadrat kanë nga 39 pikë dhe garojnë drejtpërdrejt për këtë pozicion, edhe pse mbeten nëntë javë kampionati dhe një tjetër përballje direkte në fazën e katërt.
Në takimet e mëparshme të sezonit, Dinamo, e drejtuar nga trajneri Ilir Daja, ka triumfuar në të dyja: 2-0 në fazën e parë dhe 3-1 në fazën e dytë.
Partizani vjen në formë të mirë me katër fitore radhazi në kampionat, pavarësisht eliminimit nga Kupa në mesjavë. Skuadra e kuqe ka zeruar diferencën pikësh me rivalin.
Dinamo kaloi një periudhë të vështirë me shtatë ndeshje pa fitore në kampionat para triumfit dramatik 2-1 ndaj Vora javën e kaluar. Kualifikimi në gjysmëfinalen e Kupës së Shqipërisë ndaj Tiranës ka rritur moralin e blutëve.
Ndeshja pritet e luftuar, ku një fitore ndikon kryesisht në aspektin psikologjik për të dyja palët.
Sa i përket mungesave, Dinamo nuk llogarit Qardakun dhe Beqën për shkak të dëmtimeve, ndërsa Partizani mungon Sembenen, i pezulluar pas katër kartonëve të verdhë.