Administrata presidenciale amerikane ka ndërmarrë një hetim intensiv për të identifikuar burimin e rrjedhjes së informacionit konfidencial lidhur me mangësitë e sigurisë së një avioni Boeing 747, me vlerë 400 milionë dollarë, i dhuruar nga Katari për t'u përdorur si Air Force One. Presidenti Donald Trump ka shprehur zemërim pas publikimit të këtyre të dhënave, duke çuar në ndërmarrjen e masave të menjëhershme.
Operacioni është menaxhuar nga Krahu Perëndimor i Shtëpisë së Bardhë, ku shefja e kabinetit, Susie Wiles, dhe drejtori i FBI-së, Kash Patel, kanë koordinuar punën nga një qendër operacionesh e ngritur për këtë qëllim. Sipas raportimeve, Kash Patel ka qëndruar rreth shtatë orë në ambientet e Shtëpisë së Bardhë për të mbikëqyrur procesin. Hetuesit u kanë kërkuar zyrtarëve federalë, veçanërisht atyre të përfshirë në logjistikën e udhëtimeve presidenciale, të dorëzojnë pajisjet e tyre celulare për verifikim. Disa prej tyre kanë refuzuar kërkesën, ndërsa agjenci të tjera federale kanë udhëzuar punonjësit të kontaktojnë zyrën ligjore në rast të ndonjë kërkese për informacion.
Paralelisht, Departamenti i Drejtësisë ka lëshuar urdhërthirrje për katër gazetarë të gazetës The New York Times, të cilët kanë raportuar mbi problematikat e sigurisë së avionit. Ky veprim ka shkaktuar reagimin e organizatave për mbrojtjen e lirisë së shtypit, ndërsa gazeta ka bërë të ditur se do t'i kundërshtojë ligjërisht këto urdhërthirrje në gjykatë.