Sipas raportimeve të medias britanike The Athletic, procesi për përzgjedhjen e trajnerit të kombëtares angleze pas largimit të Gareth Southgate në vitin 2024, kishte pasur si opsion kryesor Pep Guardiolën. Palët kishin arritur një dakordim verbal, por marrëveshja nuk u finalizua pasi trajneri vendosi të vazhdonte angazhimin e tij me Manchester City.
Pas dështimit të kësaj piste, FA emëroi Thomas Tuchel, i cili e mori detyrën zyrtarisht më 1 janar 2025. Nën drejtimin e tij, Anglia regjistroi një kualifikim mbresëlënës për Kupën e Botës 2026, duke fituar të tetë ndeshjet kualifikuese pa pësuar asnjë gol.
Gjatë turneut, skuadra shfaqi një formë të mirë duke kaluar grupet dhe duke eliminuar rivalë si Republika Demokratike e Kongos, Meksika dhe Norvegjia. Megjithatë, në gjysmëfinale, Anglia u mposht nga Argjentina me rezultatin 2-1, ndonëse kaloi e para në avantazh me golin e Anthony Gordon.
Performanca në këtë ndeshje nxiti kritika të ashpra ndaj Tuchel, veçanërisht për strategjinë e tërheqjes në mbrojtje në minutat e fundit. Pavarësisht presionit, trajneri gjerman ka deklaruar dëshirën për të respektuar kontratën e tij, e cila skadon në vitin 2028. Kontrata përfshin një klauzolë që lejon federatën të shkarkojë trajnerin nëse nuk arrin të paktën çerekfinalet, objektiv që u tejkalua me arritjen në gjysmëfinale.