Një aksident trafiku ka ndodhur sot në fshatin Vitomiricë të Pejës, ku një këmbësor i mitur është goditur nga një automjet. Lajmi është konfirmuar për mediat nga zëdhënësi i Policisë së Kosovës për rajonin e Pejës, Driton Rugova.
Sipas njoftimit zyrtar, policia është njoftuar për aksidentin rreth orës 12:00. Në këtë aksident kanë qenë të përfshira një veturë dhe një fëmijë, i cili ka pësuar lëndime trupore. I mituri është dërguar menjëherë për në Spitalin e Përgjithshëm në Pejë për marrjen e ndihmës mjekësore të nevojshme.
Njësitet kompetente policore kanë dalë në vendin e ngjarjes dhe janë duke ndërmarrë veprimet e nevojshme hetimore me qëllim sqarimin e plotë të rrethanave në të cilat ka ndodhur ky aksident.