Një incident në Columbia Heights, Minesota, ka tërhequr vëmendje pas arrestimit të fëmijës 5-vjeçar Liam Ramos bashkë me babanë e tij Adrian Alexander Conejo Arias nga agjentët e Shërbimit Amerikan të Imigracionit dhe Doganave (ICE). Ngjarja ndodhi të martën në oborrin e shtëpisë, sapo fëmija ishte kthyer nga kopshti.
Sipas Drejtoreshës së Shkollave Publike të Columbia Heights, Zena Stenvik, një agjent i ICE-së mbajti fëmijën gjatë arrestimit të babait. Departamenti i Sigurisë Kombëtare (DHS) deklaroi se operacioni synonte vetëm babanë, të cilin e cilësoi si i huaj i paligjshëm me rast aktiv për azil dhe pa urdhër deportimi. DHS shtoi se një oficer qëndroi me fëmijën për sigurinë e tij deri në përfundim të procedurës dhe mohoi se ICE shënjestroi fëmijën.
Avokati i familjes, Marc Prokosch, bëri me dije se Liam Ramos dhe babai i tij po mbahen në një qendër paraburgimi në Teksas. Ai theksoi se babai kishte kërkesë aktive për azil dhe se ata kishin hyrë ligjërisht në SHBA.
Fotografitë e publikuara tregojnë fëmijën me një kapelë dimërore në formë lepuri dhe një oficer duke mbajtur çantën e tij të shpinës në formë Spiderman. Imazhet u morën nga kalimtarë dhe autorët nuk u identifikuan.
Autoritetet shkollore raportuan se Liam është një nga katër fëmijë të arrestuar nga agjentë federalë në zonë gjatë dy javëve të fundit. Zena Stenvik pyeti: "Pse duhet të mbahet në paraburgim një fëmijë 5-vjeçar? Nuk mund të më thuash që ky fëmijë do të klasifikohet si kriminel i dhunshëm." Ajo e cilësoi të papranueshme përdorimin e fëmijës për kontrollin e banesës.