Federata e Futbollit e Kosovës (FFK), në bashkëpunim me Shoqatën e Gjyqtarëve të Kosovës, ka njoftuar themelimin e Akademisë së Referimit të Kosovës. Ky projekt synon identifikimin, edukimin dhe përgatitjen profesionale të gjyqtarëve të rinj, duke krijuar një strukturë afatgjatë për futbollin vendor.
Programi do të udhëhiqet nga kryetari i Shoqatës së Gjyqtarëve të Kosovës, Përparim Hasani, i cili është edhe iniciatori i kësaj nisme. Procesi i mentorimit dhe ligjërimit do të mbështetet nga emra të njohur, përfshirë gjyqtarët me stemë të FIFA-s: Fatlum Berisha, Besnik Morina, Bujar Selimani, si dhe ish-gjyqtari Kreshnik Vula.
Detajet mbi kriteret e aplikimit dhe mënyrat e regjistrimit për të interesuarit do të bëhen publike më 1 korrik, nëpërmjet kanaleve zyrtare të komunikimit të FFK-së dhe Shoqatës së Gjyqtarëve të Kosovës.