Në Prishtinë ka nisur sot seminari dyditor i organizuar nga Federata e Futbollit e Kosovës (FFK) në bashkëpunim me FIFA-n, dedikuar gjyqtarëve të futbollit. Ky aktivitet shënon zyrtarisht fillimin e fazës përgatitore për sezonin e ri garues 2026/27.
Ceremonia e hapjes së punimeve u drejtua nga presidenti i FFK-së, Agim Ademi. Ligjërimet profesionale po udhëhiqen nga ekspertë të njohur ndërkombëtarë: instruktori i FIFA-s, Alan Snoddy, dhe eksperti i përgatitjes fizike, Simon Breivik.
Programi i seminarit përfshin një gamë të gjerë temash teknike dhe profesionale, të cilat janë thelbësore për ndarjen e drejtësisë në fushën e blertë. Ndër çështjet kryesore të trajtuara janë:
• Ndryshimet në rregullat e lojës për edicionin 2026/27.
• Analiza e incidenteve dhe menaxhimi i lojës.
• Zbatimi dhe përdorimi i sistemit VAR.
• Integriteti i zyrtarëve të ndeshjes.
• Analiza e situatave nga kampionati vendor.
Një segment i rëndësishëm i këtij seminari i është kushtuar testeve fizike, të cilat zhvillohen në përputhje me standardet e larta të FIFA-s. Këto vlerësime synojnë të garantojnë që gjyqtarët të jenë në gjendje optimale për përballimin e sfidave të kampionatit të ri. Përmes këtyre investimeve, FFK synon të përmirësojë cilësinë e arbitrimit në garat vendore dhe të mbështesë gjyqtarët në përgatitjen për angazhime të mundshme në arenën ndërkombëtare.