Komiteti Disiplinor i Federatës së Futbollit të Maqedonisë së Veriut (FFM) ka ndërmarrë masa disiplinore ndaj klubit Shkëndija e Tetovës, pas ndeshjes finale të Kupës së zhvilluar më 20 maj kundër Sileksit. Vendimi përfshin përjashtimin e klubit nga gara e Kupës për sezonin 2026/27 dhe gjoba financiare në vlerën totale prej 105,000 euro.
Sipas njoftimit zyrtar, gjobat janë ndarë si më poshtë:
• 15,000 euro për përdorimin e mjeteve piroteknike.
• 10,000 euro për thirrje dhe slogane me përmbajtje fyese.
• 20,000 euro për shfaqjen e një banderole me përmbajtje naziste.
• 30,000 euro për refuzimin e ceremonisë së medaljeve dhe mosrespektim ndaj zyrtarëve dhe kundërshtarit.
• 30,000 euro për mosrespektim të himnit shtetëror të Maqedonisë së Veriut.
Krahas gjobave, klubi është dënuar me zhvillimin e 4 ndeshjeve të ardhshme në shtëpi pa praninë e tifozëve. Përfaqësuesit e Shkëndijës argumentuan se mungesa në ceremoni ishte pasojë e mosdëgjimit të thirrjes zyrtare, por organet disiplinore konstatuan shkelje të rregulloreve.
FFM ka gjobitur gjithashtu klubin e Sileksit me 5,000 euro për përdorimin e piroteknikës, ndërsa klubi i Vardarit është dënuar me 15,000 euro për sjellje të tifozëve dhe festim të papërshtatshëm të titullit. Për Vardarin është hapur gjithashtu një procedurë shtesë për përdorimin e piroteknikës në ndeshjen e javës së 33-të kundër Shkëndijës.