Klubi i futbollit Shkëndija nga Tetova ka kundërshtuar zyrtarisht vendimin e marrë nga Federata e Futbollit e Maqedonisë së Veriut (FFM), pas incidentit të ndodhur në finalen e Kupës së Maqedonisë. Masa disiplinore përfshin një gjobë prej 105 mijë eurosh dhe përjashtimin e skuadrës nga garat e Kupës për sezonin 2026/27, për shkak të refuzimit të klubit për të pranuar medaljet në ceremoninë zyrtare të finales.
Në një deklaratë zyrtare, Shkëndija e ka cilësuar vendimin si të padrejtë dhe të dëmshëm për projektin e tyre sportiv. Klubi thekson se ndër vite ka përmbushur të gjitha detyrimet financiare dhe sportive, ndërsa ka kontribuar në rritjen e koeficientit të ligës vendore përmes pjesëmarrjes në garat evropiane, gjë që ka mundësuar një vend shtesë për futbollin e Maqedonisë së Veriut në arenën ndërkombëtare.
Klubi u ka bërë thirrje organeve të FFM-së që të reflektojnë urgjentisht për të mbrojtur drejtësinë sportive. Sponsoni i skuadrës ka bërë të ditur se, nëse vendimi mbetet në fuqi, do të shqyrtohen opsione radikale, të cilat përfshijnë tërheqjen nga mbështetja e klubit apo largimin përfundimtar nga futbolli në Maqedoninë e Veriut, me argumentin se masat e ndërmarra cenojnë të drejtat dhe politikat e tyre të brendshme.