Në kuadër të Kampionatit Botëror 2026, FIFA i ka njoftuar Federatën Egjiptiane të Futbollit se uniformat aktuale të kombëtares nuk përputhen me rregulloret e turneut. Institucioni botëror i ka kërkuar palës egjiptiane të realizojë dy ndryshime thelbësore.
Së pari, FIFA ka kërkuar heqjen e 7 yjeve nga logoja e fanelës. Këta yje përfaqësojnë titujt e fituar nga Egjipti në Kupën e Kombeve të Afrikës në vitet 1957, 1959, 1986, 1998, 2006, 2008 dhe 2010. Sipas rregullores së FIFA-s, yjet në fanelë lejohen vetëm për kombëtaret që kanë fituar trofeun e kampionit botëror.
Së dyti, është kërkuar ndryshimi i ngjyrës së numrave në shpinën e fanelave. Ndonëse Egjipti ka përdorur për vite me radhë ngjyrën e artë, FIFA ka kërkuar që numrat të jenë të bardhë. Ky vendim është marrë për të përmirësuar dallueshmërinë e numrave gjatë transmetimeve televizive të ndeshjeve.