Përfaqësuesja e Haitit në futboll është urdhëruar nga FIFA që të modifikojë uniformat zyrtare për Kupën e Botës 2026, vetëm pak ditë para fillimit të turneut. Shkak për këtë vendim është bërë dizajni i fanellës, i krijuar nga kompania kolumbiane Saeta, i cili përmbante ilustrime të Betejës së Vertieres të vitit 1803.
Sipas FIFA-s, elementi në fjalë, që përkujton fitoren e forcave haitiane kundër trupave të Napoleonit dhe shpalljen e pavarësisë, bie ndesh me rregulloret për pajisjet që ndalojnë përdorimin e sloganeve ose imazheve me karakter politik, fetar apo personal. Pavarësisht se fanella u përdor më parë në ndeshjet miqësore kundër Zelandës së Re dhe Perusë, organi drejtues kërkoi ndryshime për versionin final.
Prodhuesi Saeta deklaroi se dizajni origjinal ishte konceptuar si një homazh për identitetin kombëtar dhe njerëzit që kontribuojnë në të ardhmen e vendit, dhe jo si një deklaratë politike. Megjithatë, kompania ka pranuar të zbatojë kërkesat e FIFA-s për të mundësuar pajtueshmërinë me rregulloret e turneut. Haiti bën pjesë në Grupin C, ku do të përballet me Skocinë, Brazilin dhe Marokun.