Organizata botërore e futbollit, FIFA, ka njoftuar se tifozët dhe koleksionistët mund të blejnë fragmente origjinale të fushës ku do të zhvillohet ndeshja finale e Kupës së Botës 2026. Suveniri, i emërtuar "FIFA World Cup 2026 Piece of the Pitch – Foundation Edition", është i disponueshëm në dyqanin zyrtar on-line të organizatës.
Produkti vjen në një ekspozues akrilik me përmasa 17,5 cm x 17,5 cm x 17,5 cm, i cili përfshin një USB me certifikatën e autenticitetit. Çmimi i këtij koleksioni është 450 dollarë. Sipas njoftimit, dërgesat do të kryhen pas finales së 19 korrikut dhe shërbimi është i kufizuar për klientët në Shtetet e Bashkuara të Amerikës, Mbretërinë e Bashkuar dhe Evropë.
Ky vendim vjen në një periudhë kur stadiumi MetLife në Nju Xhersi ka qenë subjekt diskutimesh lidhur me cilësinë e fushës, e cila për nevojat e turneut u zëvendësua me bar natyral nga sipërfaqja artificiale e zakonshme e NFL-së. Përveç këtij suveniri, FIFA është përballur me kritika për çmimet e larta të biletave për ndeshjen finale, të cilat arrijnë deri në 32 mijë e 970 dollarë, ndërsa paketat VIP kushtojnë deri në 34 mijë e 500 dollarë.