Biletat për finalen e Kupës së Botës 2026 në futboll, e cila do të zhvillohet më 19 korrikut 2026 në MetLife Stadium në New Jersey, janë listuar në platformën zyrtare të rishitjes së FIFA-s me çmime deri në 2,299,998.85 dollarë për vend.
Katër bileta në tribunën e poshtme, pas një porte, shiten me këtë çmim, duke e bërë totalin për to 9.2 milionë dollarë. Çmime të tjera në të njëjtin sektor arrijnë 207 mijë dollarë, ndërsa në nivele më të larta bien në 138 mijë dollarë, 23 mijë dollarë ose 11 mijë dollarë për biletat më të lira në platformë.
FIFA nuk vendos kufizime në çmimet e tregut sekondar për të penguar shitjen në platforma të jashtme, por aplikon një komision prej 15% si për shitësin ashtu edhe për blerësin. Kjo i jep FIFA-s rreth 690 mijë dollarë për çdo biletë të shitur me çmimin maksimal.
Turneu organizohet bashkërisht nga Kanada, Meksika dhe SHBA, duke nisur më 11 qershor 2026. Mbi 5 milionë bileta janë shitur deri tani, ndërsa faza përfundimtare e shitjes u hap këtë javë.
Në edicionet e mëparshme, biletat e rishitura kishin kufizime çmimesh. Për të adresuar kritikat për çmimet e larta, FIFA prezantoi në dhjetor bileta të kufizuara nga 60 dollarë.
Një zëdhënës i FIFA-s deklaroi se modeli i shitjes dhe i tregut dytësor ndjek praktikat standarde të industrisë në Amerikën e Veriut, me çmime të ndryshueshme për të optimizuar shitjet dhe pjesëmarrjen.