Institucioni më i lartë i futbollit botëror, FIFA, ka bërë të ditur detajet mbi organizimin e finales së Kupës së Botës, e cila do të zhvillohet këtë të diel në stadiumin MetLife të New Jersey-t. Pushimi mes pjesëve të ndeshjes do të zgjasë gjithsej 17 minuta, duke tejkaluar me vetëm 2 minuta kohëzgjatjen standarde të përcaktuar nga IFAB.
Sipas njoftimit zyrtar, rreth 11 minuta do t'i dedikohen shfaqjeve muzikore, ku pritet të performojnë artistë me famë botërore, si Shakira, Madonna dhe Justin Bieber. Rreth 6 minuta të tjera janë lënë në dispozicion për montimin dhe çmontimin e skenës, si dhe për ujitjen e domosdoshme të terrenit. Kjo e fundit është vlerësuar si një masë e rëndësishme për të përmirësuar kushtet e lojës, duke qenë se në ndeshjet e mëparshme në këtë impiant, fusha është raportuar si tejet e thatë.
Ndërkohë, FIFA ka konfirmuar se do të vazhdojnë të zbatohen rregullat për pushimet e hidratimit, për shkak të temperaturave të larta të regjistruara gjatë këtij edicioni. Institucioni ka sqaruar se nuk do të ketë ndryshime të tjera shtesë, duke u përpjekur të balancojë kërkesat e spektaklit artistik me standardet sportive dhe të shmangë zgjatjet e mëdha që aludoheshin më parë.
Përditësime
FIFA ka konfirmuar se ceremonia e finales së Botërorit do të përfshijë performanca nga BTS, Burna Boy, Gustavo Dudamel dhe Kori i PS22. Ky organizim synon të mbështesë 'Fondin Global të Arsimit Qytetar të FIFA-s', me objektiv mbledhjen e 100 milionë dollarëve për edukimin e fëmijëve dhe zhvillimin e infrastrukturës së futbollit në mbarë botën.