FIFA ka zyrtarizuar një paketë reformash për sistemin e transferimeve, pas dy vitesh negociatash me sindikatën e futbollistëve FIFPro, shoqatat e ligave dhe klubet evropiane. Këto dispozita, të cilat shënojnë ndryshimin më të rëndësishëm që nga viti 2001, synojnë të rrisin sigurinë kontraktuale dhe drejtësinë ekonomike në futbollin profesionist.
Një nga risitë kryesore është pjesëmarrja e futbollistëve në tarifën e transferimit. Lojtarët me pagë fikse vjetore nën 150,000 euro do të përfitojnë 5% të vlerës së transferimit. Në rast mosmarrëveshjesh, për pagesat e vonuara do të aplikohet një kamatë prej 8% nga Gjykata e Futbollit. Gjithashtu, futja e klauzolave të lirimit bëhet e detyrueshme për të gjitha kontratat profesionale në nivel global, duke lehtësuar lëvizjen e futbollistëve.
Reformat prekin edhe kategoritë e të rinjve. Futbollistët nën moshën 18-vjeçare do të mund të nënshkruajnë kontrata deri në 5 vjet, me kushtin që të jenë pjesë e akademisë së klubit për një periudhë të përcaktuar. Marrëveshja gjithashtu çon në tërheqjen e padive ligjore të ngritura nga FIFPro ndaj FIFA-s dhe krijimin e një Platforme Globale Dialogu për të monitoruar zbatimin e rregullave të reja.