Presidenti i FIFA-s, Gianni Infantino, ka bërë të ditur se organizata do të analizojë mundësinë e zgjerimit të Kupës së Botës 2030 në 64 kombëtare. Ky propozim synon shtimin e 16 ekipeve krahasuar me formatin aktual. Nëse miratohet, edicioni i vitit 2030 do të shndërrohet në turneun më të madh në historinë e futbollit.
Sipas planit, kampionati do të mbahet në tre kontinente dhe gjashtë shtete. Uruguai, Argjentina dhe Paraguai pritet të organizojnë nga një ndeshje hapëse, në kuadër të shënimit të 100-vjetorit të themelimit të Kupës së Botës, ndërsa pjesa tjetër e ndeshjeve do të zhvillohet në Marok, Portugali dhe Spanjë.
FIFA pritet ta shqyrtojë këtë propozim gjatë muajve në vijim, ndërsa një vendim përfundimtar mbi formatin e kompeticionit nuk është marrë ende.