Sot, në orën 09:30, në Gjykatën Themelore në Prishtinë filloi seanca e rigjykimit për të pandehurin Endrit Nika. Rasti ka në qendër vdekjen e shtetases argjentinase, Maria Clara Urdangaray, e cila ndërroi jetë më 1 gusht 2023. Sipas aktakuzës së Prokurorisë, ngjarja ndodhi në hotelin Sonoma në Fushë-Kosovë, ku pas një debati dhe dhune fizike, viktima kishte rënë nga dritarja e katit të gjashtë. Endrit Nika, i cili ka mohuar akuzat për vrasje të rëndë, ishte dënuar me 18 vjet burgim nga shkalla e parë më 19 shkurt 2026. Megjithatë, pas ankesës së mbrojtjes, Gjykata e Apelit e ktheu çështjen në rigjykim më 7 gusht 2026, për shkak të shkeljeve esenciale të dispozitave të procedurës penale. Gjatë procesit të ri, gjykata pritet të administrojë provat, të dëgjojë dëshmitarët dhe të rishqyrtojë rrethanat e rastit, duke përfshirë ekspertizën e kornizës së dritares, e cila u krye pas një viti e gjysmë, kur hoteli kishte ndryshuar strukturën fillestare duke vendosur xhama të rinj. Deri në një vendim të formës së prerë, i pandehuri gëzon prezumimin e pafajësisë.
Përditësime
Trupi gjykues në krye me gjyqtarin Gazmend Bahtiri, së bashku me gjyqtarët Alltën Murseli dhe Gëzim Ademi, mori sot deklaratën e të pandehurit Endrit Nika, i cili u deklarua sërish i pafajshëm për vrasjen e shtetases argjentinase Maria Clara Urdangaray. Prokuroria prezantoi detaje të reja nga aktakuza, sipas së cilës Endrit Nika dyshohet se tentoi ta përplasë viktimën me veturë në parkingun e hotelit para se çifti të hynte në dhomë. Pala e dëmtuar mori pjesë në seancë përmes video-lidhjes, e përfaqësuar nga avokati Betim Shala.
Gjykata Themelore në Prishtinë e ka shtyrë rigjykimin e Endrit Nikës për datën 25 shtator. Mbrojtja kërkoi shtyrjen me arsyetimin se përkthyesi i caktuar nga gjykata nuk e njeh dialektin zviceran të gjermanishtes. Këshilli Gjyqësor i Kosovës ka konfirmuar se institucioni nuk licencon përkthyes për gjermanishten zvicerane, por vetëm për gjuhën gjermane standarde.
Avokati Tomë Gashi i kërkoi zyrtarisht gjykatës thirrjen e të gjithë përkthyesve të licencuar nga KGJK, me qëllim gjetjen e një eksperti që ka jetuar në Zvicër. Këshilli Gjyqësor i Kosovës konfirmoi angazhimin për sigurimin e një përkthyesi adekuat për seancën e radhës. Gjykata caktoi datën 25 shtator për vazhdimin e procesit, ku pritet të dëshmojnë familjarët e Endrit Nikës.