Gjykata Themelore në Prishtinë e dënoi Endrit Nikën me 18 vjet burgim për vrasjen e partneres së tij, shtetase argjentinase M.K-U., ngjarje e ndodhur më 1 gusht 2023 në një hotel në Fushë-Kosovë. Aktgjykimi u shpall të enjten nga trupi gjykues, sipas raportimeve të Betimi për Drejtësi. Në seancë morën pjesë i pandehuri me avokatin e tij si dhe mbrojtja e palës së dëmtuar.
Në maj 2025, Nika u deklarua i pafajshëm për akuzën e vrasjes. Aktakuza u ngrit në shkurt të atij viti nga Prokuroria. Sipas saj, pas një mosmarrëveshjeje paraprake, Nika e goditi viktimën dhe tentoi ta shkelte me veturë në parkingun e hotelit. Me hyrje në dhomë, ai vazhdoi përleshjen dhe goditjet, duke e dërguar në qoshen ku ajo nuk kishte mundësi të largohej. Më pas, e shtyu, e nxori në kornizën e dritares dhe e hodhi nga dritarja e dhomës së hotelit në katin e gjashtë. Viktima nuk i mbijetoi plagëve nga rrëzimi në lartësi.
Pas vendimit, Rrjeti i Grave të Kosovës reagoi duke thënë se dënimi prej 18 vjetësh nuk është proporcional me peshën e krimit dhe seriozitetin e rrethanave. Në një deklaratë në rrjetet sociale, organizata e cilësoi rastin si vrasje me motiv gjinor – femicid – dhe theksoi se vrasja e grave për shkak të gjinisë kërkon ndëshkim maksimal. “Dënime të tilla rrezikojnë të normalizojnë dhunën ndaj grave dhe të dërgojnë mesazh se jeta e grave vlen më pak. Kërkojmë që gjykatat ta njohin qartë motivin gjinor dhe të aplikojnë standardet më të larta të ndëshkimit”, thuhet në reagim. Ky rrjet ndihmon viktimat e dhunës me bazë gjinore me këshillim dhe ndihmë juridike falas.
Sipas të dhënave, në Kosovë nga viti 2010 e deri tani janë vrarë rreth 60 gra. Organizatat për mbrojtjen e të drejtave të njeriut kanë kritikuar autoritetet për dështim në mbrojtjen e grave të rrezikuara nga dhuna, ku shpesh autorët janë bashkëshortë, baballarë ose djem.