Operacioni policor, i shtrirë në dy faza, u krye nga specialistët e Seksionit për Hetimin e Narkotikëve të DVP Berat, në bashkëpunim me Komisariatin e Policisë Kuçovë dhe forcat operacionale, nën drejtimin e Prokurorisë. Qëllimi i këtij operacioni ishte parandalimi i shpërndarjes së lëndëve narkotike në afërsi të institucioneve arsimore.
Sipas njoftimit zyrtar, 46-vjeçari A. G. u arrestua pasi në banesën e tij në Kuçovë u gjetën 3.95 kg lëndë narkotike, e cila ishte pjesërisht e ndarë në doza gati për tregtim. Ndërkohë, 19-vjeçari G. Ç. u kap në flagrancë në fshatin Moravë, ku gjatë kontrollit në banesë dhe në person, policia gjeti sasi të tjera kanabisi dhe një shumë parash, të cilat dyshohet se janë përfituar nga veprimtaria e paligjshme e shitjes së drogës.
Të gjitha materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Berat për veprime të mëtejshme penale.