Partia Demokratike ka përmbyllur procesin e zgjedhjes së strukturave të saj të reja drejtuese, duke përfshirë sekretarin e përgjithshëm, nënkryetarët dhe sekretarët e tjerë. Në këtë përbërje bie në sy numri rekord i nënkryetarëve, si dhe përpjekja për të përfshirë përfaqësues nga diaspora dhe brezat e rinj të politikës.
Megjithatë, analisti Fitim Zekthi e sheh këtë zhvillim me skepticizëm. Ai vlerëson se këto ndryshime nuk shërbejnë për të kapërcyer krizën sistemike që po përjeton forca më e madhe opozitare në vend. Sipas Zekthit, përpjekjet për t'u shfaqur si një parti që reformohet dhe demokratizohet vetëm sa e bëjnë më të dukshme krizën, nëse ato nuk shoqërohen me ndryshime thelbësore në identitetin politik.
Roli i opozitës dhe gjykimi moral
Sipas Zekthit, detyra e një partie opozitare është të identifikojë problemet e vendit, të ofrojë zgjidhje dhe të dëshmojë se idetë e saj janë të brendësuara në lidership, dhe jo të marra vetëm për nevojat e momentit. Ai argumenton se kur një forcë politike artikulon qartë bindjet e saj, ajo mund të sfidojë qeverinë.
Duke iu referuar veprës "Përgjegjësi dhe Gjykim" të filozofes Hannah Arendt, analisti nënvizon se një organizatë politike bie në krizë të thellë kur humbet aftësinë për gjykim moral. Sipas tij, pikërisht kjo mungesë e gjykimit është faktori që pengon opozitën të jetë efektive përballë qeverisë aktuale.