Në kuadër të xhiros së tretë të AlbiMall Superligës së Kosovës, Prishtina regjistroi një fitore të thellë 4:0 ndaj Llapit në stadiumin “Fadil Vokrri”. Vendasit kaluan në avantazh që në minutën e dytë me anë të Assane Diattës, i cili shënoi edhe golin e tretë në minutën e 71-të. Golat e tjerë u realizuan nga Albin Krasniqi (63’) dhe Arianit Fazlija (84’). Kjo është fitorja e dytë për kryeqytetasit në dy ndeshje të zhvilluara, ndërsa Llapi vazhdon të mbetet në fundin e tabelës pa asnjë pikë.
Nga ana tjetër, Drita shënoi fitore 1:0 ndaj Vushtrrisë në ndeshjen e zhvilluar në Kampin Nacional në Hajvali. Goli i vetëm i takimit erdhi në minutën e 77-të nga Arb Manaj, i cili goditi saktë me kokë pas harkimit të Almir Ajzerajt. Ndeshja u shoqërua me tensione midis tifozerive “Forca” (Vushtrri) dhe “Intelektualët” (Drita), të cilat shkaktuan ndërprerje të përkohshme të lojës. Gjithashtu, lojtari i Vushtrrisë, Haris Ibrisagiq, u ndëshkua me karton të kuq në minutën e 82-të pas një ndërhyrjeje ndaj Igball Jasharit.
Vushtrria mbetet pa pikë pas tri ndeshjeve, ndërsa Drita ka mbledhur gjashtë pikë nga dy përballje, pasi ndeshja e saj e mëparshme ndaj Prishtinës ishte shtyrë për shkak të angazhimeve në garat evropiane.