Mijëra qytetarë u mblodhën pasditen e 13 qershorit në bulevardin Dëshmorët e Kombit në Tiranë, për të marrë pjesë në protestën e 14-të masive radhazi. Tubimi u karakterizua nga shtimi i simboleve ndërkombëtare, ku krahas flamurit shqiptar, u valëvit edhe flamuri i Mbretërisë së Bashkuar.
Përdorimi i flamujve të shteteve perëndimore, si atyre amerikane dhe gjermane në tubimet e kaluara, është kthyer në një element të dallueshëm të kësaj lëvizjeje. Sipas organizatorëve dhe protestuesve, këto simbole përcjellin kërkesën për zbatimin në Shqipëri të standardeve demokratike të vendeve të zhvilluara, me theks te drejtësia, meritokracia dhe llogaridhënia.
Prania e simbolit britanik lidhet gjithashtu me mesazhin e diasporës shqiptare që jeton në Mbretërinë e Bashkuar, e cila ndjek me shqetësim zhvillimet në vendlindje. Protesta është zhvilluar në mënyrë paqësore, ndërsa thirrjet kryesore të qytetarëve kanë qenë për largimin e qeverisë dhe ndryshimin e sistemit politik.