Në protestën e zhvilluar përpara Kryeministrisë, aktori Florjan Binaj ka mbajtur një fjalim para mijëra pjesëmarrësve. Gjatë fjalës së tij, Binaj kritikoi qeverisjen e kryeministrit Edi Rama, duke deklaruar se ai prej 13 vitesh po ndikon negativisht në fatet e vendit. Aktori akuzoi kryeministrin për përpjekje për të përçarë qytetarët përmes organizimit të mitingjeve paralele.
Sipas Binajt, kjo protestë përfaqëson një shtresë të gjerë të shoqërisë, përfshirë punonjësit e administratës dhe patronazhistët, të cilët, sipas tij, detyrohen të marrin pjesë në aktivitetet e qeverisë. Ai kërkoi një qasje të rreptë ndaj drejtësisë për të gjithë zyrtarët që kanë abuzuar me detyrën dhe kanë shkelur ligjin.
"Kushdo që nga viti 1990 e këtej ka shkelur ligjin, duhet të përballet me drejtësinë. Kërkojmë burg për ata që kanë vjedhur, pa privilegje dhe pa trajtime të veçanta", deklaroi Binaj përpara turmës në bulevardin "Dëshmorët e Kombit". Fjalimi i tij u shoqërua me duartrokitje dhe brohoritje nga protestuesit.