Nisja e sezonit veror ka sjellë një fluks të shtuar të lëvizjes së qytetarëve që udhëtojnë nga vendet e Evropës drejt Kosovës. Sipas të dhënave, pikat kufitare të Serbisë po përballen me vështirësi në qarkullim për shkak të numrit të lartë të automjeteve.
Në pikën kufitare Bajakovë, e cila lidh Kroacinë me Serbinë, si dhe në pikën kufitare Horgosh, që lidh Hungarinë me Serbinë, janë regjistruar kolona të gjata automjetesh. Kamerat e trafikut konfirmojnë praninë e pritjeve të gjata në këto pika, të cilat përdoren nga mijëra bashkatdhetarë që udhëtojnë për t'i kaluar pushimet verore pranë familjeve të tyre.
Autoritetet parashikojnë që intensiteti i qarkullimit do të vazhdojë të mbetet i lartë edhe gjatë ditëve në vijim, për shkak të numrit të madh të mërgimtarëve që nisen drejt vendlindjes.