Pika kufitare e Kapshticës ka regjistruar një fluks të lartë lëvizjesh gjatë katër ditëve të fundit, ku më shumë se 30 mijë qytetarë kanë dalë nga Shqipëria drejt Greqisë. Fluksi përbëhet kryesisht nga emigrantët shqiptarë që po kthehen në vendet ku jetojnë dhe punojnë pas përfundimit të pushimeve verore.
Sipas të dhënave zyrtare për 24 orët e fundit, nga Kapshtica kanë dalë 5,795 shtetas, ndërsa kanë hyrë 3,229 të tjerë. Për të përballuar këtë ngarkesë, autoritetet kufitare po punojnë me katër sportele në dalje dhe tre në hyrje. Udhëtarët kanë raportuar pritje që arrijnë deri në dy orë, ndërsa radhët e automjeteve shtrihen edhe në zonën neutrale në kushtet e temperaturave të larta.
Ndërkohë, situata në pikën kufitare të Qafë Thanës paraqitet normale për këtë periudhë. Gjatë 24 orëve të fundit, në dalje janë regjistruar 4,551 shtetas dhe në hyrje 3,248, ndërsa procesi po menaxhohet përmes pesë sporteleve. Autoritetet parashikojnë që fluksi në dalje nga Kapshtica të vijojë të jetë i lartë edhe në ditët në vazhdim.
Përditësime
Autoritetet kufitare konfirmuan rritjen e fluksit të udhëtarëve edhe në pikën kufitare të Kakavijës. Sipas të dhënave zyrtare, rreth 20 mijë shtetas kanë kaluar përmes kësaj dogane drejt Greqisë gjatë tre ditëve të fundit, si pasojë e mbylljes së pushimeve sezonale.
Pika kufitare e Kakavijës po përballet me ngadalësim të trafikut për shkak të punës së palës greke me vetëm një sportel në hyrje. Gjatë 24 orëve të fundit, autoritetet kanë përpunuar 11,534 shtetas, ku 7,602 kanë dalë nga territori shqiptar dhe 3,932 kanë hyrë. Në total, janë regjistruar 3,228 mjete në lëvizje hyrëse dhe dalëse.