Për të dytën ditë radhazi regjistrohet fluks i lartë emigrantësh në pikën kufitare të Kapshticës midis Shqipërisë dhe Greqisë, për të festuar Pashkën në vendlindje.
Sipas të dhënave zyrtare, gjatë 24 orëve të fundit kanë hyrë 7 475 qytetarë në Shqipëri, ndërsa 2 741 kanë udhëtuar drejt Greqisë. Lëvizjet kanë qenë të përqendruara kryesisht paradite, por situata mbetet e menaxhueshme në të dyja anët e kufirit.
Pala shqiptare ka vënë në funksion 3 sportele në hyrje dhe 3 në dalje. Autoritetet greke operojnë me 3 sportele në dalje, duke parandaluar krijimin e radhëve dhe pritjet e gjata.
Që nga fillimi i javës, mbi 30 mijë emigrantë kanë hyrë nga Greqia në Shqipëri. Autoritetet kufitare kanë shtuar kapacitetet dhe personelin për të përpunuar shpejt lëvizjet gjatë kësaj periudhe festive.
Emigrantët shfrytëzojnë ditët e pushimit për të kaluar festën pranë familjarëve në Shqipëri. Fluksi pritet të vazhdojë në ditët në vijim, siç ndodh çdo vit në prag të Pashkës Ortodokse.