Në pikën e kalimit kufitar Kapshticë, në prag të Pashkëve Ortodokse, ka nisur fluksi i lartë i udhëtarëve. Shumë shqiptarë po kthehen nga Greqia në vend për të festuar me familjarët.
Autoritetet shqiptare kanë marrë masa për të përballuar situatën, duke shtuar numrin e sporteleve. Aktualisht, në hyrje të territorit shqiptar funksionojnë 5 sportele, ndërsa në dalje vetëm 1. Fluksi më i madh regjistrohet në hyrje, por pala shqiptare ka arritur të shmangë krijimin e radhëve dhe pritjeve të gjata falë hapjes në maksimum të sporteleve.
Situata në palën greke është më e ngarkuar, me udhëtarë që raportojnë pritje deri në 1 orë e 30 minuta. Një familje nga Kalkidhikia, e destinuar për Elbasan, u shpreh se ka pritur rreth 20 minuta deri në gjysmë ore në anën greke, ndërsa kaloi shpejt në palën shqiptare. Një udhëtar tjetër, që kishte 1 vit pa ardhur në Shqipëri, priti 1 orë e gjysmë në Greqi, por kaloi direkt në doganën shqiptare.
Autoritetet shqiptare vijojnë të monitorojnë situatën, pasi fluksi pritet të rritet në ditët në vijim.
Përditësime
Autoritetet kufitare raportuan të dhëna për 24 orët e fundit:
- Në Kapshticë: 7 475 hyrje dhe 2 741 dalje.
- Në Qafë Thanë: 3 292 hyrje dhe 2 984 dalje.