Pavarësisht kushteve atmosferike dhe reshjeve të shiut, fluksi i lëvizjeve nga Kosova drejt Shqipërisë mbetet i lartë këtë fundjavë.
Qytetarët e Kosovës zgjedhin zonat bregdetare shqiptare për të kaluar kohën e lirë, ku një pjesë e tyre posedojnë banesa ose prona. Një qytetar nga Ferizaj deklaroi: "Do të dalim pak për qejf. Çdo dy muaj, për dy-tre ditë, këtu vijmë e kalojmë fundjavën."
Gjatë 24 orëve të fundit, në pikën kufitare të Morinës kanë hyrë dhe dalë mbi 17 mijë persona dhe rreth 11 mijë automjete. Të dhënat tregojnë se fluksi rritet javë pas jave me afrimin e sezonit veror.
Prej datës 1 maj ka hyrë në fuqi marrëveshja për kalimin pa kontrolle të automjeteve me targa të Shqipërisë dhe Kosovës, e cila ka lehtësuar qarkullimin në kufi.
Muaji prill shënoi rekord për turizmin në Shqipëri me 891 mijë e 414 vizitorë të huaj, rritje +8.8% krahasuar me prillin e vitit 2025. Rritja e vizitorëve nga Kosova ishte mbi 10%. Kryeministri Edi Rama publikoi këto shifra, duke theksuar interesin në rritje nga vende si Danimarka, Italia, Polonia, Franca, Kanadaja, Mbretëria e Bashkuar dhe SHBA për natyrën, kulturën, bregdetin dhe mikpritjen shqiptare.